Ninguén, agás a súa nai e a súa avoa, sabe que Lark estivo a pasar polos peores meses da súa vida; hai mañás nas que apenas pode saír da cama. Non pode contalo a ninguén, porque, nun mundo onde se ten todo o material que se desexa, a túa vida está destinada a ser «perfecta», aínda que o teu pai acabe de morrer. Con todo, despois de case un ano loitando cos seus demos, Lark deixa o seu fogar en Manhattan para mudarse temporalmente ao rancho da súa avoa paterna nun pequeno pobo chamado Sequoia Falls. Alí, ademais de reconectar coa súa avoa, coñece a Holly, unha rapaza afeccionada á astronomía, que lle ensina a ver a vida a través dos seus ollos e a entender que algunhas cousas son máis sinxelas do que pensamos. Amosalle o universo desde a fiestra do seu cuarto e, máis importante, ensínalle o que se sente ao estar namorada por primeira vez. -- A autora non escribiu esta historia coa intención de cambiarlle a vida a ninguén, non a escribiu coa intención de que gañase premios ou fose un best seller, escribiuna porque necesitaba escribila, como unha especie de terapia. Quería que fose un abrazo para esas persoas cuxa tristeza é a súa mellor amiga.