Este libro é un sopro ao corazón que nos introduce na relación entre dúas artistas brillantes, dúas mulleres que se aman e que constrúen os seus días en compañía.

O noso mundo amosa dunha forma próxima, íntima e poética a relación de amor entre a poeta Mary Oliver e a fotógrafa Molly Malone Cook, a través de diarios, notas e poemas. Unha fiestra á maxia privada dun universo compartido cheo de palabras e de imaxes, guiado pola atención ao detalle e polo asombro ante o cotián. Un libro sinxelo e honesto que é un canto ao amor, á natureza e á creación.

«"Cada vez que chego a casa ―cada vez― /alguén alí me ama. /Ata entón/ detéñome na acostumada e negra paz/ como un piñeiro calquera"

Entre o asombro de recibir amor de amante e o de formar parte do mundo (amplo, brillante, animal) este libro é unha homenaxe á intimidade de dúas mulleres creadoras que se elixiron e viviron xuntas. Pero non só, ademais de nomear o compartido, Mary Oliver toma certa distancia para contar a Molly Malone na súa sabedoría e a súa mirada distinta, gozando da súa práctica fotográfica como unha observadora que nunca se cansa de mirar».

Sara Torres