Cada cultura agardou da persoa que nace bioloxicamente home, uns determinados valores, actitudes e modos de afrontar a súa propia existencia, que debían ser cumpridos para dese xeito ser aceptado na comunidade plenamente. Con todo, todo o que se saía (e aínda se sae na actualidade) destas normas debía ser arrinconado, anulado ou corrixido no mellor dos casos, como ocorría coas persoas que manifestaban unha sexualidade diferente aos patróns heteronormativos, ou unha divergencia entre o sexo biolóxico e ao que se sentían pertencentes. A obra que ten entre as mans recolle por vez primeira unha análise profunda e rigorosa sobre a transexualidade, incluíndo un periplo histórico que abarca desde a Antigüidade ata os nosos días, con todos os cambios políticos e sociais que se foron producindo, e desgranando tamén a evolución das mentalidades e a loita política e social de homosexuais e transexuais para reivindicar os seus lexítimos dereitos. Neste imprescindible texto inclúense así mesmo numerosos testemuños de persoas transexuais que revelan en toda a súa crueza o lento pero inexorable cambio rexistrado no noso país, e mesmo se referencia a evolución suscitada noutras nacións do noso ámbito cultural; modificacións todas elas que influirán de xeito decisivo na adaptación das leis, a percepción social e o tratamento que os medios de comunicación outorgan actualmente á transexualidade. Un libro, en suma, máis que necesario, expresión dunha aspiración de xustiza.