"Formen filas" ofrece unha visión íntima e cativadora da vida de Choriza May, unha figura icónica no mundo do drag internacional. Mediante unha coidada selección de fotografías tomadas no backstage onde as artistas se preparan para dar todo, este libro vai máis alá das brillantes luces e os chamativos vestiarios que serven de emblema ao drag para mostrarnos o que sucede entre bambalinas. Desde a présa e a anticipación inherentes a un espectáculo de DragRace ata os momentos de quietude e espera, estas imaxes revelan tanto a vulnerabilidade como a coraxe necesarios para asumir un dos roles máis desafiantes e subversivos da sociedade do espectáculo. O libro traza un percorrido desde a penumbra do camerino ata os focos do escenario, compondo un profundo relato coral que nos fala da esencia e a complexidade da vida drag. Un brillante discurso visual onde resoan obras como "Cruising Utopia", de José Esteban Muñoz, "Love and Resistance", de Jason Baumann, ou a película de culto "Wigstock", de Barry Shils. A obra de Choriza May non é só un rexistro fotográfico, senón un manifesto sobre a resiliencia e a capacidade de transformación que ofrece un contrapunto á percepción pública da cultura drag, a miúdo ensombrecida por estereotipos e prexuízos. Este libro é un auténtico tesouro para os amantes da fotografía, os estudosos da cultura queer e, por suposto, os fans de Choriza May.