Fiel á súa formación autodidacta, David Wojnarowicz desafiou as fronteiras entre linguaxes, medios e accións, e escapou das definicións unívocas: foi pintor, músico, fotógrafo, escritor, realizador de películas en Super 8 e protagonista decisivo do efervescente contorno social e cultural do East Village de Nova York nos anos oitenta. Da súa obra visceral sobresae o seu espírito colaborativo –en comuñón fluída con outros–, pero tamén contestatario. Membro do colectivo act-up, Wojnarowicz foi un activista moi implicado coas políticas identitarias dos homosexuais antes e durante a epidemia da sida, enfermidade que o privou de amizades e amores e que o levou incluso a el en 1992, aos 37 anos.

Neste libro aparece a trastenda dos escenarios que son os protagonistas das súas obras máis famosas, e está presente o rexistro constante do seu corpo, que se agudiza cando recibe o seu diagnóstico de vih positivo. É consciente de terse contaxiado cun virus que encarna ademais o peor dunha sociedade enferma; unha que marxina e exclúe cada vez máis as disidencias e as abandona á súa sorte. En la sombra del sueño americano exhibe o rexistro privado dun Wojnarowicz sensible e comprometido, abafado polas demandas de supervivencia, perseguindo o pracer e a liberdade incluso cando xa non hai máis luz ao final do túnel.