As corporalidades, identidades e orientacións non heterosexuais, trans e intersexuais estiveron tradicionalmente afastadas do ámbito da educación formal, coma se a vida e a escola fosen dúas realidades disociadas entre si. Coa chegada da educación afectivo-sexual, abriuse unha oportunidade para que estas formasen parte da cotiandade escolar, pero os contidos ligados aos riscos arredor das infeccións de transmisión sexual e dos embarazos non desexados, xunto coa súa prevención, acapararon o tratamento que se fai da sexualidade nos nosos centros. Son contidos que, ademais de desprazar o colectivo LGTBIQ ata o seu borrado neste campo educativo, agochan mensaxes discriminatorias que reproducen e lexitiman as distintas violencias que sofren as persoas que non se axustan aos parámetros normativos de sexualidade (binarismo, ciscentrismo, heterocentrismo, monosexualidade, LGTBIQfobia, etc.). Así, mentres que as formas non hexemónicas de transitar a sexualidade son cada vez máis visibles entre as xeracións máis novas, no ámbito da educación escolar existen múltiples dificultades para atender esta diversidade de maneira profunda e integral. Neste sentido, o presente libro explora esta relación entre educación afectivo-sexual e colectivo LGTBIQ –máis caracterizada polos seus desencontros ca polos seus encontros–, trazando un percorrido por distintas dimensións da realidade sociocultural, desde o foco no que o autor denomina sistema normativo de sexualidade ata o marco escolar e a educación afectivo-sexual. A continuación, preséntanse os resultados dun estudo e remátase con algunhas propostas que permiten orientar a práctica docente cara á consecución dunha educación afectivo-sexual diversa e igualitaria.