Os creadores da páxina web de cultura pop e moda Tom+Lorenzo descifran as referencias que están detrás dos elementos recorrentes do programa máis queer do planeta, desde a biblioteca á pasarela, pasando polos chulazos e as mensaxes escritas con pintalabios no espello. Pero non fai falta ter visto Drag Race (¿a que estás esperando?) para gozar dos momentos e das figuras lexendarias do mundo drag que o inspiran. Como advirten os seus autores, este é un libro para ler cunha soa man…, coa outra quererás buscar vídeos, cancións ou máis información en Google sobre os formidables personaxes que desfilan polas súas páxinas. Asistimos aos disturbios de Stonewall da man da mítica Marsha P. Johnson, a raíña que paseaba por Nova York con flores no cabelo, e de Stormé DeLarverie, o drag king que patrullaba Greenwich Village en traxe de chaqueta. Escoitamos a Crystal LaBeija, fundadora e nai da formidable Casa de LaBeija, erguer a voz para reivindicar a beleza negra no certame de Miss Gay America. Colámonos nos salóns de Harlem onde naceu o vogue, o baile que popularizou Madonna, e nos clubs do Londres dos noventa con Leigh Bowery e os seus looks imposibles. Todo iso coa música de The Rocky Horror Picture Show de fondo. É o tipo de historia que non che deron na escola.