Unha comedia romántica queer apaixonada e astuta sobre atreverse a arriscar e aceptar o amor con todas as súas complicacións.

Delilah Green xurou non volver a Bright Falls, onde só lle quedan recordos da súa infancia solitaria na que era pouco máis que unha carga para a súa madrastra fría e distante. A súa vida está en Nova York, onde a súa carreira como fotógrafa está a medrar e a súa cama nunca está baleira. De acordo, cada noite acompáñaa unha muller distinta, pero así está ben.

Cando a súa irmastra Astrid a presiona cun sutil sentimento de culpa e cun talonario de cinco cifras para ser a fotógrafa da súa voda, Delilah non ten máis remedio que volver ao pobo ao que unha vez chamou fogar. O seu plan é chegar e marchar canto antes, pero entón ve a Claire Sutherland, unha das mellores amigas de Astrid, e decide que, despois de todo, quizais si haxa algo divertido que facer en Bright Falls.

Claire Sutherland é nai dunha filla de once anos á que criara practicamente soa, ten que soportar ao seu desastroso ex e é a encargada dunha libraría, así que a súa vida non ten espazo para sorpresas. E Delilah Green é unha sorpresa moi pouco benvida, ao principio. Aínda que se coñecen desde hai anos, non se coñecen de verdade, polo que a Claire inquieta que Delilah saiba exactamente o que a fai saltar. Cando se ven envoltas no torbellino dos preparativos para a voda, incluíndo unha artimaña para salvar a Astrid do seu horrible prometido, Claire comeza a dubidar da súa capacidade para resistirse aos encantos de Delilah. E o que é peor: comeza a pensar que tampouco quere facelo.